Nuummi Najukkami Ataatsimiititaliamit aningaasaliisoqarneratigut Nuup Kangerluani nutaamik silasiutitaartoqarpoq. Asiaq nutaamik silasiummik, maannakkut atuutile-reersumik, ikkusseqqammerpoq. Sumiiffiup nalaani angalaartartunut silasiutip ilu-aqutaanissaa naatsorsuutigineqarpoq.
Uummannap Tunuata kujataata kangiata nalaaniittumi Uummannap Sulluata Kapisillillu Kangerluata akornanniittumut Qeqertannguamut silasiut nutaaq ikkunneqarsimavoq.
Silasiutip nutaap ilaatigut anorip sakkortussusaa sammivialu uuttortassavaa. Angalasut soqutigisallilluunniit allat Asiaq-ip nittartagaanut https://vejr.asiaq.gl/#/table iserlutik qanoq anorlertiginersoq malinnaasinnaapput. Paasissutissat akunnikkaartumik nutarterneqartassapput.
- ”Silasiut sapaatip-akunnialui misilittarsimalerparput. Massakkullu takusinnaasagut aallaavigalugit Nuummi, Kapisilinni Qeqertannguullu nalaani anorit assigiinngitsuusut takusinnaalereerpagut. Taamaattumik naatsorsuutigaarput silasiummit paasissutissat angalasartunut iluaqutaalluarumaartut,” Asiaq-imi sulisoq, Anders Læsøe, taama oqarpoq.
Silap qanoq innera pillugu paasissutissat Kalaallit Nunaanni sineriak tamakkerlugu paasissutissaat https://vejr.asiaq.gl/#/table aqqutigalugu takuneqarsinnaalereerput, soqutiginnittullu silasiutit 38-t uuttugaat malinnaavigisinnaavaat.
- ”Nuummi Najukkami Ataatsimiititaliap suleqatigineqarnera nuannaarutigeqaarput. Nuna tamakkerlugu silap qanoq issusia pillugu ilisimasagut pitsanngorsarusuttuaannarpagut, taamaattumik silasiutit amerlanerulerniassammata silasiutinik nutaanik ikkussuinissatsinnut suleqatiginnikkusuttunik suli ujartuivugut. Paasissutissat inuiaqatigiinnut naleqassusii ilisimavagut, nittartagarpullu atorneqartorujussuulluni.” Anders Læsøe oqarpoq.
Nunat tamalaat akornanni pitsaassutsit akuerisaasut aammalu Kalaallit Nunaanni silaannaap qanoq issusia aallaavigalugu Asiaq-mi silasiutinik pilersuineq aserfallatsaaliinerlu ukiut 30-t sinnerlugit misilittagaqarfigaarput.
Anders Læsøe
Aqutsisoq imermik silamik avatangiisinillu misissuineq