Ilisimatusarfimmi Zackenbergimi Tunup Avannaarsuaniittumi Asiaq sila, silaannaap pissusaa imernullu attuumassusilinnik paasissutissanik katersisarpoq. Ukiuni qulikkaani kingullerni Issittumi kiassuseq nunarsuup sinneranut sanilliullugu sisamariaammik sukkanerulluni qaffakkiartorpoq.
Asiaq-mi sulisut marluk Zackenbergimi uuttuutit misissoqqammerpaat.
- Ukiumut ataasiarluta Zackenbergimi uuttuutit misissoriartortarpagut. Misissuinerit Zackenbergimi ingerlanneqartut amerlanerpaartaat Asiaq-ip silaannaap pissusaanut paasissutissanut katersaannut ikkunneqartarput, taamaattumik uuttuutit ajunngitsumik ingerlanissaat pingaaruteqartorujussuuvoq. Paasissutissat pitsaasuunissaat pingaartittorujussuuarput.
- Misissuinitsinni ullut pissanganartorujussuusarput. Qutsissumukarluta mastinukartarpugut uuttuutit alakkarlutigit, elektronikkinullu attuumasut ajunnginnersut paasiniarlugit suarsuit tamaasa maluginiartarlutigit.
- Ukioq manna Zackenbergimiinnerput upernalernera eqqorluaavippaa, aput aakkiartulerpoq, kuummi siku qupititerpoq, timmissat takkussuutilerput nannumillu ataatsimik takulluta, nanorlu taanna misissuiviup eqqaani ingerlaarujooriarluni ingerlaarfini nangeqqiinnarpaa. Taamaattumik avannarparterujussuarluni sulineq nuannersorujussuusarpoq, taama oqarput Kirsty Langley aamma Roman Ackle Asiaq-meersut.
Zackenberg ilisimatusarfik 1995-imit 1996-imut sananeqarpoq, pisortatigoortumillu 1997-imi ammaanersiorneqarluni. Ilisimatusarfik Namminersorlutik Oqartussanit pigineqarpoq. Asiaq nuna tamakkerlugu nunallu tamalaat akornanni silaannaap, imernut tunngasut serminullu tunngasut pillugit ilisimatusarnermi peqataavoq.
